Frühlingsfest in Garmisch,
ois is auf de Fiaß,
de Susi mit ihrn Gspusi,
und de Gretl mitn Hias.

Jeder is schee ozogn,
des beste ausm Schrank,
da Miche ziagt an Bauch ei,
schau, fesch is er und schlank.

Ja sunst, do huckans bloß dahoam,
heit kemman‘s raus in Rudeln,
Jeder in sein scheenstn Gwand,
ois riacht noch Mottnkugeln.

Die Moni mitn Özgün
und da Achmed mit da Zenz,
da Helmut mit da Aische
und die Yüksel mit Vinz.

Frühlingsfest in Garmisch,
ois is auf de Fiaß,
do die bäse Resi,
und drent des junge Gmias.

Am Marktplotz spuit a Oldie Band
Rocknroll wia‘s g‘härt,
der Sänger is ganz rot im Gsicht
weil er so laut plärrt.

Und der do gfoit ma gornet,
der hot an schlimmen Wackler,
is des net der dicke Bernd
der Immobilienmakler?

Wos di hams scho operiert,
naa, i woaß fei gornet recht.
wos, in Partenkirchen drent?
Ja deswegn gehst du gor so schlecht.

Wer is des mit de gfarbtn Haar,
des is die Appollonia?
und neben ihr der Kerl in Grün,
mei, de schaut ja aus wia gspiem.?

Wo hots den Kerl bloß aufto?
Naa, so a schiacha Hobe,
vielleicht im Sonderangebot
am Wühlhaufen beim Obi.
Is des da scheene Martl,
seit wann geht der denn z‘Fuaß?
Dem hams an Führerschein gezwickt,
der wui net geh, der muaß!

Im Klinikum da Dokta,
hot gsogt, i hobs am Knia.
er taats ma‘s zwar gern macha,
er woaß bloß no net wia.

Frühlingsfest in Garmisch,
iatz gehts durchanand,
de Madln mitn Gamsbart, und
de Buam im Weibergwand.

Koana woaß, wo‘s higeht,
olle hams zvui glodn
da Sepp sogt zu da Lisi,
Lisi, trog mi hoam.

Lisl, sog wo bist du?
Hejf ma bitte, Maus,
i hob des Hendl net vatrogn,
i loß glei wieda naus.

Ein Hund kimmt hinterher und denkt:
ja lecker, sowos loßt der raus,
der putzt des Hendl weg wia nix,
für den is des ein Spitzenfraß.

Am nächsten Tog is olles wieder
so wia‘s oiwei waar,
de Männer gehn in d‘Arbat
da Kopf fast wieder klar.

Die Frau sie giaßt in oller Ruah,
de Blumen am Balkon,
wenns Trinka für den Mo guat is,
werds de Blumen aa net schodn.

Da Bua kimmt von da Schui hoam,
mit Hosn waschlweit,
den Zwickl untn bei de Knia,
a Bua, der hots net leicht.

Und auf der Straß geht frisch verliebt
die Rosi mit dem Bernd,
ihr neia Schwarm, den hots
beim Frühlingsfest erst kennaglernt.

T&M: G. Ringsgwandl